سنواتى الاربع بالكلية ( النتائج المؤسفة).

الحقيقة انا كنت متوقعة ان وانا في ثانوى هابقا حاجة جامدة في الكلية

عشان مشلتش الحمد لله ولا مادة في ثانوى
مع ان دا كان بيحصل ادامي كتير.


لكن في الكلية الموضوع اختلف.


كانت سنة اولي اثار كلها مواد تاريخية.


تاريخ مصر فرعوني
تاريخ يوناني
تاريخ دولة عربية
جغرافيا تاريخية

وكتير من المواد التاريخية التانية

دا طبعا غير المواد في غير ذات التخصص
يعني دراسة الاثار الاسلاميك
والاثار المصرى
والاثار اليوناني

غير مواد اللغة واللي كانت هيروغليفي بس .


وبما ان في دكاترة مش من قسم الاثار اصلا بيدرسولنا اساسا موادهم التاريخية.
فكان لازم اتبع خطوات السابقين.
بس انا مسمعتش كلامهم للاسف.


يعني قالولنا ان احنا لازم في مادة تاريخ يوناني
لازم نكتب كتير جدا
ان شاالله نملي الورق بالاغاني

لان الدكتورة -الله يسامحها بقا- بتقيس بالشبر مش بتقرا.


بس انا عملت مخلصة بقا وكتبت زبد الاجابات في سطور قليلة بس مركزة والله.
وبكدة شيلت مادتها بكل اقتدار.

والاستاذ الدكتور مدرس مادة تاريخ دولة عربية.
دا كان رحيم علي كل الدفع وبيدى امتيازات الا دفعتنا
نصها بالتمام شال المادة.
وانا واحدة من اللي شالوها..

بس وربي كنت حالة حلو جدا.


عدت سنة اولي بمادتين
وطبعا كنت مقهورة لاني اول مرة اجرب الشعور البشع دا والله.
وطبعا اتعدمت التقدير في السنة دى.
............................

في سنة تانية.
امتحنت تاريخ دولة عربية
وجيت امتحن تاريخ يوناني
الحرس قالي بكل رقة مصطنعة ( الامتحان دا كان امبارح انتي مجتيش ولا ايه؟).
لاقيت الدنيا بتسود قدام عنيا.

تاني سنة التقدير يروح عشان مادة دكتورة - الله يسامحها بقا- عزة شعبان.

......................................

سنة تالتة.

طبعا في مواد معانا اربع سنين زى التاريخ الفرعوني عشان تقسيمة التلاتين اسرة دول.
والهيروغليفي طبيعي معانا من اولي لربعة وكل سنة وبيزيد فيه حاجات بالهبل.

بس في سنة تالتة انضاف مادة جديدة وهي هيراطي.

* كمية المواد اللي بندرسها بطبيعة الحال كبيرة.
بس ربنا بيقدر.


المهم في تالتة امتحنت تاريخ يوناني الله يحرقه
وقمت -بكل اقتدار - شايلة هيروغليفي.
مع اني وربي شاهد عليا حليت فيه كويس.
بس معلش.

وادى تالت سنة يضيع فيها التقدير.


رابعة بقا .
برغم من صعوبة المواد وشدة الدكترة في اخر سنة دى,,والابحاث.. والتعب
الا اني قلت لازم اعمل حاجة قبل ما سيب الكلية.

وربنا قدرني بقدرته وحده والله وجبت (جيد جداااااااااااااااااا).


وانتهت رحلة كفاحي من اولي لرابعة جامعة.

زهره